واحد شقيان دخل عيادة أسنان فاخرة عشان يصلح اللي بوظه الزمن في بقه الدكتور بصله وقاله ببرود: "عايز جراحة رقمية بـ 50 ألف جنيه!". الراجل اتصدم وسأله: "طب لو بعتلك فكي بالكامل يساوي كام؟" الدكتور ضحك وقاله: “ولا نكلة !”
أهلاً بيكم في عصر "الذكاء الاصطناعي" وطب الأسنان الفضائي مكان ما الروبوتات بتصمم الابتسامات والطباعة ثلاثية الأبعاد بتعمل فك بديل في ثواني في نفس الوقت اللي بؤ المواطن الغلبان في سوق الاستثمار الطبي ميسواش نكلة!
هي الرفاهية دي هتشوفها مستشفياتنا الحكومية ضمن "العلاج على نفقة الدولة"؟ ولا التطور عندنا هيفضل آخره حقنة بنج شديدة المفعول و"خلع" من الجذور وتفضل التكنولوجيا حكر على العيادات "الخاصة" اللي محتاجة قرض بضمان السبع جدود؟
العالم بره بيتكلم عن جراحات فك فورية لضحايا الحوادث والأورام وإحنا هنا دكتور الأقاليم لسه بيجاهد عشان يلاقي كرسي أسنان شغال بالكهرباء مش بالبركة! فين خطط التدريب بجد؟ ولا هنفضل عايشين على قوافل طبية "شكلية" للتصوير واللقطة ويمشي الأطفال بعيوبهم الخلقية ووجعهم زي ما دخلوا؟
السؤال : إذا كان فم الفقير بيساوي "صفر" في حسابات البيع والشراء تفتكروا الروبوت الرقمي هيرضى يعالج غلبان ببلاش ولا أقصى طموحنا مع التكنولوجيا دي إن "السيستم يقع" فـ يخلع الضرس واللسان مع بعض؟
